SONNIENDE LIBERTADE

Curriat su caddu rude,
in cumbatta cun su 'entu,
in mindas
e arvuredos umbrosos
e losànos,
innijende a su sole.
D' 'eranu sos umores
li daiant su briu,
sa diciosa badìa
chi attit su gasare
in libertade sa vida .
Fit seda cordonada
sa giua niedda, lughente,
aundàda che mare
in s'azza 'e sa currina .
Braja allutta
sos ojos
e cantos de granitu
sos muscolos forzudos,
abbrazzados
da -e pedde de broccadu .
Una bandera fidi!
Sa calarina bianca
pius ermosa de s'ama,
fit sa sua.
Suos fint su chelu
semenàdu 'e lumeras,
sos fiores,
sas ervas saborìdas.
Su mundu totu,
fit sou!
Como hat solu duas cosas :
trobeas in ancas,
chi l'impedin su passu,
e unu prammu 'e terra, tancàda
cun palones de linna!