S'ARRAZZA MIA

S'arrazza mia s'est pesàda
in su silenzi' 'e i' granitus
chen' 'e fueddus di assentai
chen' 'e orizzontis di acciappai.
lmboddicaus che granus di arenada
innòi s'hat cassau su tempus ,
a un'incuminzu de sapienzia
s'hat bintu s' arretumbu serregau
de unu de i' centu deus de su mundu .
Incrubendusì asub' 'e nosu
su strepitosu "dèu" ha fattu niu
in s'origa. Aici s' est pesau
s'arereu di Adamu, nasciu
chen' 'e mamma e chen' 'e babbu,
scallau in cent'arrazzas diversas
e accrisotau chi oru in su fogu .
Aici seus bivius, dognunu
circhendu su "dèu" propriu
po ottenni una sienda de memorias
e castiai prus aillarg' 'e su mari.
Ma est acabada s'art' 'e su deus nostru:
su mari non tenit orizzonti
veti po chini benit di attesu.
A palas nostras su mundu s'est inserrau.
Ananti teneus s'urtima storia:
cussa de su cassintegrau Biddaxidresu
o de su minadori disoccupau 'e Nuraxi Figus.
S'istoria de totu un'isola abbruxada.
Sighit in su silenzi' 'e ì desertus
s'arti sua unu piccaparderi Serrentesu,
un'arraminaiu 'e Sarcidanu,
un'oreri Stampaxinu.
In manus nostras su nudd' 'e una spuma
si sciollir'in ainas de fogu.
S'arrazza mia chi est incuminzada muda
immòi ghettat issa cussu zerriu,
su "dèu" altìvu a s'atera gent' 'e su mundu.
Bastat cun is cadenas! Su mari
in s'arena non hat a cancellai prus
msciun'arrastu.