UN'ATERA CHENA

Su fatt'est chi s'abba non si frimmat
nemmancu in su mare si reduit
est sa voluntade 'e sos mortos
chi ammasedat sas pedras
e-i sas arveres ficchit
e imbenujat
intesu nd'azis berbos
in sa trona 'e sos chelos?
Oe so andadu a su frailarzu
a m'accontzare su coro
a fiama 'e fodde
pagu trabagliu inue 'e Vulcanu
sas istinchiddias bolan
e istoigas ruen.
Eppuru sun in fiore sas carrelas
reulas de ancas lijas
cun coronas de fozittas chene coro
boghes de ispina
laras de chera
cun determinu su fiorarzu
ammattulat promissas
unu soddu una rosa
pro un'ateru unu lizu
natura morta
in su vasu 'e familia.
Su 'entu 'erettu andat istraccu
s'est increschidu 'e su cannedu redossu
su boidu a boltas
isterret raighinas nodosas.
Ma corno mi tramudo in leone
sos canes atzettan sempre
una chena 'e trabagliu
no' a totu sas pascas
si podet sacrificare anzone.