MARINERI DE ISTEDDOS

Illaccanadu
in sos funnales bodios de sos chelos
astore irmarinadu
inghirio chertoranne
tra gromeros de astros e isteddos
s'iscuricore pichidu 'e su nudda
in punna
de carch'isperallada 'e luches nobas.
No esistit
nè linea e nè puntu:
e dae su present'e su passadu
non si nn'aperin precas
in sa nott' 'e s'ustinu
a cosas benidoras.
Sa terra
est una predischedda in su desertu:
e zeo,
chene perunu pasu
in s'anticu disterru
ispentumadu
tra calancas fungudas
de mudas solidades,
m'irmentrico
murmuttos e minettas
irroccos e lamentos.
Eppuru
s'animu meu attribadu
appredad'e ispreu
s'apprantat de isporu:
e gai
dimanno piedade
a tottu sos isteddos affridados
d'una junta de pasidu cossolu .
Ma canno
mi paret chi su coro
ingranidu s'intennat
de infinidu e de eternidade,
tanno
comente in d'unu sonnu
torro pizzinnu
a zocare chin bozzas de istrazzos
tra ghighinar'e grillos istiales
in s'arjoledda de su campusantu:
E chene mi sapire
m'intenno bochiare a boche manna
s'abbandonu de Cristos in sa ruche.