NOTIE DE LUNA

Da-e s'aera m'abbaidas a sa muda
totta umbrada e sena lugore
e cun ojos velados de piantu!
Proite ses trista o luna transidora?
Proite has sa cara tant'isconsolada?
Deo chilco da -e te paghe e cunfortu
ca ses istada, est beru,
a mie tantas boltas,
amiga e tistimonza
in gosu e in dolu.
T'ammentas cando essia solu, solu,
e a oras t'istaio rimirende
e pensende a cuddos oscuros velos
chi fin calados subra 'e sos ammentos
e cando dai ucca
m'essiat su sorrisu
serenu e immaculadu
e cando ancora in pettus
mi paschiat s'ispera in sa vida
e cantu fit bellu s'amore
sutta s'incantu de sa lughe tua?
!stanotte però, amiga luna,
penso chi mi cheres dimustrare
chi dividis cun megus su dolore.
S'istillu crudele e sambenosu
chi m'hat puntu su coro,
a tie puru hat devidu toccare?
Ite uccone ranchidu che fele
in buia si m'est postu de traessu!
Custa notte funesta e conturbada
m'hat leadu unu frade
pro lu jighere a ue
s'isolvet de s'umanu ogn'ispera
e pro restare solu
lambrigas chi colan in sa terra
a pes de una rughe piedosa
da ue han a ispuntare
fiores de consolu!
!stanotte, o luna,
mi faghes cumpagnia in su piantu!