SEU STETIU

Seu stetiu testimongiu de spantus
in su cursu de s'esistenzia mia;
biséri de unu mundu nou
mi seu intregàu a sa canzoni
chi cantat e consolat e donat
cuntentesas eccisadas a su coru.
Insidìu de bellesas hapu circau
apprìgus calentosus in s'amiganzia
cun genti de bonus fais chi confortant
che bàsidus donaus de chini stimat
cun animu imboddiàu de castidadi
franca de dogna umbra de peccau.
Hapu agatàu scusorgius di amori
chi m'hant ammanniàu su sentìdu
e m'hant abertu gennas e camminus
chi portant a celus profetizzaus
po chini cun onestàdi bivit e tenit
contu de is debilesas e perdonat.
E seu stetiu basau de sa fortuna
chi m'hat bofiu fillu e m'hat donau
a manus prenas cun generosidàdi
is pannus bellus bramàus de su poeta
candu pigau de idea bona e gentili
mòvit su cantu liricu a sa luna.
Hoi sempiri marradòri de versus
curru ancora a is mizzas de su préxu
chi mantenit in pèi s'edàdi mia
surda a is toccus surdus de s' 'eccèsa
possedìda coment'esti de su cantu
e sempiri bisèra de unu mundu nou.