LUXI

Has inserrau sa notti foras de domu.
S'apret 'e s'ingestu narat is arrexònis:
dogna omini format sa cocchetta ,
si furriat in bremin'e seda
po non morriri in tottu.
Non connoscis prus iscurìu, fradi:
immòi sa dì tua est totu luxi
e su silenziu unu cristallu di aquas
chi ndi prenit su tempus. Aici s'arrisu,
chi trigat a si ndi studai.
Su chi abarrat de sa vida
non ti parit berus : pruini o marmuri!
Una cosa est su Iugori de is monumentus,
is fueddus de sa connoscenzia
circada in dogna furrungoni;
atteru est su chi si movit in s'airi,
is sonus chi si furriant in bentu
e su 'entu chi s'appaxiat in sei.
Is fueddus òi ti luxint
chena prus scurigadroxu.
Su de domandai e su di ottènni
sunt cosas allenas
lassadas in terra:
custa est sa vida eterna
chen'e tempus
e chen'e croxu.
Custu respiru, cust'airi
non spacciant mai e non has a podi
prus calài a papai su pani de domu,
a srubìri s'aqua frisch'e funtana.
Sa parti prus bella d'has tenta:
aici has inserrau sa notti
foras de su baullu.
Ses cresciu
coment'e pappi de mendua
aintr'e su croxu de linna.
Has postu matta noa
aintr'e nosu,
fra di
de su coru stimàu.