SU FOGARONE

Pigaiamus dae Cantareddu
s' iscalinada 'e Pitotto
ue in d'unu bicculu 'e carrela
in paris e chenz'impedradu,
attesu dae carros e degoglios
e in s' umbra 'e sos palatos altos,
giogaiamus finzas a garici
abboghinende e movende
comente catteddos iscapàdos .
Como so pighende cun affannu,
su logu mi paret pius minore
s'aera casca e a paga lughe
e ammentende cun azzigu 'e tristura
si no m'apparto benzo arrodadu.
Su tempus est passadu
e s'idet in megus e in totue,
finzas in cue ,
in cussu trettu, ue
faghiamus su fogu pro santu Giuanne
carrende brazzadas de restuju
dae su campu messadu 'e su Redu.
Nois giovaneddos de tando
cuntentos in sas tradisciones
brinchende su fogu a manu tenta
nende memulas de promissas
pro esser nessi compare e comare.
Cantu nos paria t fazile sa vida
e misteriosu s'amare,
disizadu tantu
chi nos sentiamus de ' olare
solu a bider in cussu muru
dessign a das dae su fogarone
sas umbras nostras aunidas.
Compare e comare!
Giuanna o Peppina
a manu tenta suspirende
sutta su caminu 'e sa paza
guasi subra a nois
e azzinnende.