PUZONES DE PASSU

Mi podes dividire a s'infinidu
unu trettu 'e caminu.
Ecco nd'has percurridu una metade,
e, prima , una metad' 'e sa metade
e, prim'ancòra ,
su mesu de su mesu 'e sa metade.
Est gai chi Achille pede-lestru
non sighit su tostoinu in carrera;
e una frizza,
iscoccada dae s'arcu,
occupat unu trettu
sempr'oguale a sa longhesa sua :
est, duncas, firma ...
Forsis, pro custu, est firmu su dolore,
firmu in su coro de s' Umanidade :
lu trapassat, non passat, istat firmu,
firmu, pro sempre , in su matessi puntu.
Però ...
comente curret s'abba in su rizolu!
Ecco, pensas: "m'imbergo". Ma in s'istante
s'abba 'e su riu tou est già mudada:
has fattu in tempus solu a lu pensare ...
Forsis gai
sun s'Amore e su Bene,
e gai puru est sa felicidade.
Tue los pensas solu, non los toccas
e non ti toccan isses;
tue los pensas e passana:
sun puzones de passu, passan solu .
Forsis los bisas,
ma los bisas ebbia:
non nd'ides che sa puba
in custu logu tou dormi-ischida!