MASSIMAS E MINIMAS

1
Nde ruen sos muros
ma no' sa tirannia
si truncan sas cadenas
ma no' sa presonia
ca a ruer est che a morrere
chene fine
e pasu est una 'oghe in sa mente
chi mai niunu hat bidu
s'ecu 'e una gana repitidu
in s' 'adde longa 'e su tempus persighidu .
2
Si vis pacem para bellum
traduidu cun violenzia
da-e una massima
a una minima
sa paghe est una gherra.
3
Mai a s'illudere!
Sa paghe est un'andera
unu numeru abertu 'e passos in cadena
non portu 'e pensamentu
PAX
est tremenda
est perpetua
ab-soluta-mente
super-lativa-negativa
pensamentu bae!
4
E-i s'ordine cominzeit dai s'abolottu
inoghe totu est minudu
ma in punzione si parva licet ...
(su dovere est dovere)
semus bene intrados in caminu
ticchirriamus cun impignu
e in su minore nostru
s'ordine est dechidu
pro s'istrina a chie ruet in caminu.
5
Mi retiro - mi reduo
falo da-e chimas de lughe temporaneas
a inghirios in basciuras
e giamadu in cunduttos anzestrales
isviluppo negativos.