BISU

Sezziu in su scannu basciu
m'est de consolu su mirai abbistu
s'andai pasiau de is nuis moddis,
bellas, pitticas a bortas,
trottoxadas e fortis casi sempiri.
Hapu bisau e disigiau
di essiri asub"e issas,
sterrtu a longu in su mantu insoru
annappau e biancu.
Hapu bisau di arziai de pagu sa manu
po lassai scurriri
intr'e mes'e is didus
s'asulu pasiau de unu celu
trasparenti e spumosu.
Gosai de sa paxi cun sa circhiolla
chi ampuendi m'attumbat,
abuchendisinci pustis, a scabiossu,
cun s'amori de una carizia mia.
M'appampu in su gosu de podi' ammesturai
su spiritu miu a totu cussas luxis
senz"e castiai a basciu.
Innì c'est sa terra. su mundu miu
di aundi mi ndi 'ollu fuiri.
No bollu prus torrai a biri
is montis accuzzus, is costeras pomposas
e azzudas, is padentis birdis
chi arreparant a iscudu sa tretta de pagus vilis
chi si cuant intr'e mesu de sa bontadi de medas.