INCONTRU

Nenna Bissenta affurrungonada
su logu pulliu, su scannu furriau
sa domu oberta e su fogu studau ,
Nenna Bissenta si nc'est andada
a cara 'e cera, bistida 'e dì 'e fattu ,
Nenna Bissenta intru e t'agatu,
in su scuriu, chenz'e musciai,
pani callenti po sa mandada,
Nenna Bissenta innui as a andai
ancora pipia giai sutterrada,
Nenna Bissenta aici prexada
candu obrexendu andasta a spigai
Nenna Bissenta appenzamentada
is fillus chi no podìant abarrai .
Nenna Bissenta innui ses andada!
Ti lassu unu prantu a com annuau
po su chi no has tentu,
po su chi has lassau,
in custu meri infrusau de nieddu
ti lassu una lantia
in s'apposentu:
tui meri 'e domu,
deu piccioccheddu
in d'unu tempus de soli, de sartu, de bentu.