ABBA 'E MITZA E PITZINNIA
(Sa funtana 'e Serrantes)

Canno, in pitzinnia,
criadura
ki sa vida sua biviat
sigunnu sa Natura
ke animale areste libero kreskinne,
accassu 'e sidis
m'imbenugaia in s'oru de sa cora
pro poder bìbere
s'abba frisca 'e sa mitza
o peri in dzogu ebbia,
a coro ispipillu,
istèrridu a traessu in su caminu
sa cara bi imberghia
kentza buffare
su tempus si podiat puru frimare.
Ammelladu 'ondzi motu,
a inghiriu a inghiriu
in su mudore de sa cussordza
solu si intenniat
su cròculu 'e sa funtana
pàsida illassidzanne.
Su murmuttu sou
fuit unu cantu lenu.
A s'animu meu
de pore e ispantu prenu
partat s' alenu
istremenadu 'e unu deu.
In s'umbraghe de sa kresura,
in cussu logu de paghe e de frtséura
sene bisos e desidzos
ego pro semper addurare keria
e non tenia fastidzos.