NISCIUNU FUEDDU

Su coru tuu interrau
asutt'e is perdas antigas.
Has a scoberriri
ita boliat nai s'arrisu de is babbus
su sabori marigosu de su meli
sa jana spollinca chi baddat a sa luna.
Su respiro fridu de su tempus
arrunzat totu is cosas.
Deu hapu scobertu comenti s'est ftrmau
su tempus de custa terra,
sa spera immobili prus non signalat
is seculus de s'istoria.
Su coru nostu spappau in is perdas
abeliat s'erba abbruxada de is pasturas.
Chini m'hat a nai cali manu
hat allutu s'urtima foresta ,
cali manu hat messau s'urtima vida .
Non bìu prus su stari
andariègu de s'airi: innoi
non ci sunt prus celus po bolai.
A cali umiadròxu heus a curriri?
Is bisus nostus speranzas sunt
seminadas a spaniu in surcus de mari:
in s'arena si spigat morti sigura.
Nisciunu fueddu est prus dolorosu
de sa speranza chi stentat a biviri.
Chini scidi si s'erba
hat a torrai ammadurai in is pasturas.
Su coru nostu interrau
a peis de una cocciula bùrnia
in dd'unu mari de sali. sali, sali
axedat.