CANDO S'UCCHIDIAT SU PORCU

Cando s'ucchidiat su porcu,
in sa corte de sas puddas,
sos minores v'imus tottus.
Intravat su ziu chin sa socca
e lia ghettavat a sa barra 'e supra
poi nde lu vocavat dae s' armarju.
Su mannale tottu gangas e frente
puntavat sos pedes e tiravat
apporrinde sos cheiveddos .
Tando su ziu chin sa istrale
l'isocciavat a sa taula 'e su cheiveddu
e su porcu rughiat illaganau.
Lu punghian e li muricavana
su liputhu in gorgovenas
e l'usciavan a ocu 'e iscareja.
Poi li prendian sos archiles a s'iscala,
la pesavana ritza e l'iscorgiavana .
Sos pizzinnos vadiavana e timiana.
E pius timiana cando lu gherravana
pro lu ghettare a terra, e lu prendiana
chin sas ancas a pare, e lu punghiana
vrimandeli sa barra, e it in sentidos
e abbochinavata e gherravata
e poi si nde moriat a bellu a bellu.
Ma cando it tott'attu, cando sos zios
si garrigavana unu ladus peromine
e los isterrian iii sas mesas pro s'ammàniu,
tando sa timoria it agabbada
e pizzinnos e mannos si la ridiana.
Su malu, su chi s'isciàt ch'it malu,
it a l'ucchidere e pro l'ucchidere
si muttiat zente meda, pro essere in medas,
ca, cando sa gurpa est de medas,
nisciune at gurpa, e s'anima 'e su porcu
no 'iscit chin chie si la vortare,
ma eo mi lu vidio addenotte
su mannalone chin sos occios tristos,
chi mi navat: "Is tue! Is tue!
Ridende rosicandemi sas uriccias.
E mi nd'as manicau sa coa e sas ungeddas
e as mantesu s'isterju pro su sambene
tue e mi l'as muricau chin su canneddu
e ti l'as viviu chin papassa e tuccaru
su samben meu." Ed eo navo chi nono ,
chi no 'ipp'eo, chi mi l'avian dau
su sambene, chi eo nonde cherio.
Gal'oje in die so gasi, non pro porcos,
no 'ucchido e non bio pius ucchidende
ne porcos e ne mancunu ateru animale
ne zente, ma addenotte mi capitat su propriu
de vier occios tristos chi m'ingurpana
e mi nan: "Is tue. Is tue
ridende rosicandemi sas uriccias,
muricandelu e bivendelu su sambene."
E mi nd'ischido nande: "No 'ipp'eo!"
ma tristu e chene pius ispezia 'e nudda.