REBELLE

Pigaiat s"udrone in sas baddes selenu selenu ...
E luego lugores atzesos de melalidone
subra lébios nìnnidos birdes s"idian addae.
Babbu sétzidu affacc'a sos boes istraccos
iscumbattat s'arzola e prammizat s'aera.
E in tottue
fiagu 'onu 'e laore messadu.
Fut ora 'e andare ...
Giughia in ojos brincos de crabola.
E calarinas arestes a trumas
in venas finz'a ìmbenas currian.
Tott'in d'una che lampu in sas nues a imperriones
de s'ultimu isteddu calancas segretas
e lùghidas immensidades attraessaia ...
S'intendet su càntigu disisperadu
e licchittu de s'ispigadora.
E ferit sas frinas chietas e punghet su coro.
Ite 'oza 'e fuire!
Un'abbisciu 'e pappàiles rujos
un'annìjidu isoltu in sas tancas
unu sonu fieru 'e corra
una lepa ficchida in s' ammentu ...
Re belle!
E cantad o re ispantadu
de largas solidades biaittas.
Ma su riu brinchittat in mesu sas pedras ancora.
E-i s'attaccadorza pertùnghet anisca su chercu ...
Fìcchidi reu e iscultami 'ehe!
Mi so istrobeidu 'e manos mias ...
Como s'ultima soga intro s' anima pendet isfatta.
E che deris in dudas m'agattas inoghe cantende
a cuncordu sos dillos de sa 'innennera.
Rebelle chetando sas dies ingràido 'e dies,
sueradu 'isadore chena tempus ne logu.

In pianta 'e manos s'avréschida nuda mi ballat.
Da-i s'unda cun tegus si 'enis a nascher l'appretto ...
E che unu pitzinnu innotzente ispràmmino trtgu
in s'affidu isettadu e dicciosu de sas cuntierras.
Emmo, tottu sos rattos brottan fruttu!