IN S'ORU 'E SU MARE

Sa soledade m'est inghiriende
in lacanas de tempus pius istrtntas
die pro die, e non cun pedras de cuile,
ma cun ispuma 'e mare bianca nida
lebia chi paret aria
e cun cantigos de deris e de oe
e boghes de ammentos e de dolu.
Si movene sas abbas de su mare
buddende chena pasu
comente chi b'esseret unu fogu
sempr'azzesu in su fundu 'e s'abissu.
A dies s'iscudet s'unda abbulottada
contr'a sas altas roccas
de sa costera a las bettare a terra
o torrat lena lena
a pè de sos iscoglios murmuttende.
Passan navìos intantu
andende a s'atter'ala 'e su mundu
e los sigo cun ojos e cun coro
cant'imbattit sa vista
fin'a cando non sunu disparìdos
che bolu de puzone
in sa lughe 'e su sole.
Beninde sun sas dies a sa lestra
a serrare su giru tott'in tundu
che presone ue che resto in disisperu
de poder impreare
pagas oras ebbìa
a fagher calchi cosa pro sos omines
e salvare sas alvures, su giogu,
su bisonzu 'e sos basos
e de sas serenadas a sa luna
cando sa notte est bella
e pasidu su coro.
Est tando chi mi torras a sa mente
dae su tempus andadu o dae su filu
istrizile chi cosit chelu e mare:
e movende sas laras a su risu
mi naras cun sos ojos sa peraula,
chi solu l'ischis tue, de s'accunortu.