CANDO ...

Cando sos puzoneddos in amore
ciulaian cantilenas serantinas
e sa vena frisca e bundanziosa
faghiat cantare limpidos trainos,
nues lebias e passizeras
cartgnaian artas s'aera nostra.
Cando ranas cantaian in pischina
e grillos cracchidaian intanados,
cando 'elidas de pasidos masones
e falches isfriscadas dai suore
fin tottu una suave melodia,
sa foresta fit bestida a festa
e tottu faeddaiat limbazu 'e poesia.
Como nues de ranzigas ispinas
sun luende sas aeras nostras,
carenas nudas a francas a chelu
paren fricchinende cun attas de resolza
s'astraosu mudine 'e sa natura.
Semus bidende àrridos istios
e incunzas lanzas de laore,
e non gosamus pius 'eranos fioridos
ne ijerros cobertos de ambaghe:
visiones de tempos isparidos.
Cando in sa terra 'e sos nuraghes
an a torrare a borrare sos rios
e sos puzones a criare in sos nidos
e su 'irde a ispantare sa foresta?
Cando s'an a ricamare sos terrinos
d'estimentas doradas sutt'a sole
e cantigos de massajos e pastores
an a ispannare sas lunas de s'istiu?