SU SICCORI

Su tallu cun is ossus sporgentis
arromigat sa spina de is padrus ingroghius,
tra perda e cambus siccus.
Su siccori in is montis de Gerrei,
nd'ha messau s'erbuzzu
siccau prima 'e su tempus,
e puru su murdegu arrubiàu
si tremidi in su bentu,
tra brebeis meda langias,
cun sa lana annuàda e tottu trottoxàda.
A milli, a milli si contat sa codula,
est abarrada sceti sa spinarba,
sbiadìa e appettillada
in su pruini scuru.
Funt'aturaus is beulus
in s'arretronu 'e is roccas,
e is vitellus corrinanta, assidius,
fuendi in mesu is breccas,
puntus de su musconi.
Aundi calada, limpiu, s'arrizolu
sa terra è giai sciuttada,
siccau su mattuzu, su lampazzu allullau.
Is arranas, cantendi in su siccori,
circanta sa piscina giai sciuttada.
In su gutturu 'e s'omini chi pigat su sabòri
de su disgustu e de su marigori,
ndi bessidi sa boxi serregada
che · beulu affannau de brebei morendi,
che gurrùliu spantàu de cani abbandonau,
s'intendit impotenti a rimediai,
che mistèriu 'e pregai
a su Deus de s'acqua
chi sciùnda' custa terra!