SU CARRU 'E NANNAI

Citti!
Istuda sa candela,
non pregontisti prusu
e non fazzasta sonu
nemancu respirendu.
Iscurta ca est passendu
su carru 'e nannai ...
Non timas
su scurìu 'e Friasciu.
Poita t'accugurras
a su péttus miu,
nebodéddu istimau?
Non ti nd'azzìcchis
chi scoittant is lampus:
cussa est sa luxi de su lantioni.
E non timas is tronus:
est solu su torroccu 'e su lamoni.
E candu, cresciu e fattu mannu,
tui has a camminai
in su mori serpentinu
de una vida 'e turmentu,
has a intend'isturdìu
is tronus infernalis
de bruvura e de morti.
Fatta sa cuntierra
po sa virtudi, su pani, s'amori
has a circai discansu
asutta de sa pinnaccuzza
in s'antigu foscili.
E m'has a nai:
contamì su contu 'e «Su carru 'e Nannai ... ».