POETA

Dego l'isco a ube andas!
A pala sa taschedda istrazzulada
tragande versos fraziles, anticorios.
E andas a parpu, guasi trambuccande ,
su cantu est unu piliu 'e furfularju
perdiu in duna mala temporada.
Tue chircas, pedidore, chen'appozzu
remuzos de ispaziu for'e tempus
(remuzos chi no esistin).
In cada monte ... innedda,
peri in su prus attesu de su mundu
azzappas un'antenna
chi rezzidi e rimandat milli undas:
tempus chi fughit a ritmu de luche
e non si firmat pro una crapa 'e versos.
E tue, poeta, sichis a ch'arziare
in su Carbariu 'e versos e de bisos
e nemmos cumprendet su lamentu
chi naschit dae unu coro moribundu.
Poeta, tue che ses fora 'e su tempus!
E chin sa conca a mughitas, che moju
mesu attolondrau ser gal'andande
forzis pro ti seder in sa Iosa
de Shakespeare o de Byron.
Ma non t'illudas
chi benzan a ti facher cumpannia
sar birghines ingresas a diosare
sa marna morta o s'ammirallu Nelson:
atteros impinnos
l'isettan in fravicas umbrosas
o in sa televisione de Inghirterra.
Bae, banduleri e sicas a cantare:
l'isco chi cussos versos sunu prantu!
Tantu ses solu: chi andes o ti firmes.
No est tempu de poetas, de poesia.