PROITE PIANGHIDES?

Narade a unu Poeta:
ti cherzo 'ider pintare
una conca 'e granitu ìdrinu,
o bugiardare sa zente 'essende 'ia,
o ispianare sos versos in fine,
o no est peus attillare una 'este?
O forsis temperare una istrale
cun s'ozu e 'ogareli s'atta
chi devet leare?
O forsis no est diffitzile
limare cun sa limba
sos cherveddos iscontriados
de sos imbecilles :
eppuru tottu semus netzessarios
pro fagher girare sa roda
de su coro
e tirare a s'abbarru 'e una diga
una budascia 'e paraulas
pro abbare s' ortu poeticu,
e abbellire custu mundu
nesigadu dae mentes umbrosas.
Fraigare sas domos
cun paraulas de ferru
'oghende ischentiddas
che-i su chelu in cabidanni,
chi fuen sos isteddos,
che fera accanizada
a pettus in susu,
'ue in s'assettiada
si pasan subra una rocca
frobbendesi su suore.
Sa terra est de samben' imbreaga
unfiende sa 'entre
che tzecca a prim'istadiale.
O montes de dolores:
proite pianghides?
Proite s'ojiu 'e s'abbila
fuit a una lagrim'antiga?
Proite in millajias de soles
lughen roddulende
fin' a su pée de su monte;
non t'annicches
non cumpliches a sos Poetas sa lughe,
e si podes imbia cun sos ispijios
lughe e poesias.
E-i sa die det sonare
sas campanas suas!