Premio Ozieri di Letteratura Sarda

Tottu est chiettu … nudda moet !
ne moes tue
ma orìi paradu ses cue in appittu …
e cuddu occasu miras
ca paret si ch’istèniet a istudare
bistentèndesi, in d’una iscutta ‘e pasu;
e cue, in accisu e arrimu, miras
sas umbras illongadas de palattos
cun cascos de balcones
ancora abertos.
S’illastrigadu, ingalenadu, est solu;
calchi unu s’allenat recuende
in s’oru ‘e su trainu;
isvenant sos affannos !? …
tott’isponet e agabat
fora ‘e laccana e fine;
.. e manna incùmbit in tottue
s’isterrida ‘e belludu
… tèssida da’ Mudines.

Bidos los has intrede
e como in melodia
si che faghen’ serare
umpare, in tremuleu;
o in Cuncordu ‘ogadu
dae mill’alenos de pasidas frinas
chenza mastru perunu a cuviare.
Gai inchintu, sas frinas ti che tragant
e de angustìas e pessos
durche, su boidu seras ! …
libbaru e irbrattu
t’accisat s’iscultare
su sonu chi no est;
ma pro sorte, de dura, che l’has cue
e in su mudine seras
s’appasigu ‘e su tottu.
Lebia …
pare sicch’ingalenede … sa morte.