Mama Santa protettora,
Reina de s'altu tronu,
dias Tue su perdonu
a s'anima peccadora.
Cust'intreu populadu
de sa 'idda 'unnanaresa
pedit perdon'a s'offesa,
penitente, imbenujadu.
ch'haiat abbandonadu
s'antiga Tua dimora.
Dias Tue su perdonu
a s'anima peccadora.
Da' hoe, Santa Maria,
de Iscalas nominàda,
in sa cheja rinnoàda
ti faghen pregadoria,
ch'allevies s'angustia
de sa zente pattidora.
Dias Tue su perdonu
a s'anima peccadora.
Santu simbul'immortale
ses adorad'in totue:
Mama netta solu Tue
de peccadu originale;
ses lughe ispirituale
benigna consoladora.
Dias Tue su perdonu
a s'anima peccadora.
S'ingiustizia terrena
cunvertas a s'onestade
pro haer s'umanidade
sa vida pius serena;
sias sullev'a sa pena
e de paghe difensora.
Dias Tue su perdonu
a s'anima peccadora.
Dogn'infirmu cristianu
invocat su nomen Tou
e chircat s'amparu sou
in su cultu Marianu,
ch'aggiudu sa Tua manu
li diat in s'ultim'ora.
Dias Tue su perdonu
a s'anima peccadora.
Giovanni Soggiu (Bonnanaro)
3° premio 2006
(Sezione tra poesia e canto «Antoni Cubeddu»)