TORRAI A DOMU

Unu bòlidu lebiu e dilicau
de cardaneras in su 'entu

un arrumbuài prexerosu
de perdas faci a mari

de pixinas in sa 'ia
de arrius sullenus
... est su torrai a domu !
Est una baligia prena
de bàsidus e de carìnnius
po chini m'abètada speddiosa
in su mragini afinau de s'enna.
Est agatai s'erba 'e arrosa frorìa
in su parapetus de perda

su morixeddu antigu
e s'ampuàda chi mi condùsit
deretu deretu a cùcuru.
Est s'arregodu chi m'avolòtat
de unu pipiu scruzu
chi cùrrit in su 'entu
po acciapài mariposas
grillus
e bisus stramancaus ...
stramancaus de ora!
Est circai "a pustis" cun assupu
me is aposentus sderrutus
sa presenzia
una boxi
calincunu
chi no m'hat a corrispundì' mai

candu ... su torrai a domu
est agatai unu lettu sciusciau
is mantalafus arrumbullonàus

sa carida bòira e su fogu studau.
Est su fragu 'e s'acorru

su biri is cosas impruinàdas
s lassàdas stai.
Est cussu stogumòsu fragu
de tristesa
de serrau
de dolori
de acabau !

IGNAZIO MUDU
nato ad Assemini l'11/05/1953
Impiegato Universitario
Residente in Via Tevere
7
09032 ASSEMINI (CA)