SA FESTA 'E NOSTRA SEGNORA 'E SU REMEDIU
DE OTIERI.

Riccos e poverittos, tottu frades,
in Otieri mia han tribagliadu;

e una festa bella han preparadu
pro venerare sa Virzine Santa.
Sa iddha 'e Otieri totta canta
s'es' fatta digna 'e sa Mama sua.

Si sun giamados: lentos e in fua,
benini a Otieri sos pastores;
mazzones no han timidu nè astores:
s'ama sola e ispalta l'han lassada.

Da' ogni iddha, dae ogni contrada,
in istradones o in tirighinos,
gruppos a caddhu, a pe, de pellegrinos
sun bennidos pro Te, Nostra Segnora.

Babbos e fizzos, mamas, a un'ora,
coros in allegria o in affannos
mudos Ti han pregadu o a gridos mannos,
che undhas chi tempestana in su mare.

Mamas appo idu in su pregare,
cun sos fizzos in brazzos suspirendhe,
bezzos de allegria pianghendhel,
sa paghe in ojos, sa. berritta in manu.

Bestidos che puzzones
fieros e fortes che aspru granitu,
sardos in ragas, sardos in corittu
in biddha mia si sun'abbrazzados,

Puzzones mi pariana torrados
a sa Mama amorosa e a su nidu;
e tottu han pregadu a cor'unidu
pro custa terra, pro custa Sardigna

amore e paghe e sorte pius digna.