INBERANU

Jaia
sceràt sa simbula
ingiriend'intr'e duus didus
su ciuliru portentosu

a tempus cadenzau
lèbiu ddu sbattiat
incrubendidd'a su pannu
sterriu in su canisteddu

Sa simbula fini
calàda a pag' a pagu
e sa prus grussa
abarràt asùba a caragolu
in mes'a su ciuliru

dda spingiat a parti
cun s'oru de sa manu
e nd'idd'ingolliat asuba
cun sa turr'allisàda
luxenti po s'usu antigu

M'incantàt s'adasiu lentu
de cussa faina sua
e su cantidu a mesu boxi
de is muttettus suus
sempri ugualis

In beranu si poniat
anant'e sa ventan'oberta
chi donàt a sa lolla
aundi appiccaus
a bigas beccias sanziànta
cadineddus de cadilloni
approntaus po acatài
is arrundilis a sa torrada

Schilius ammacchiaus
agatendi su niu...
Unu bolidu terra terra
de attumbai sa manu
ejaja no cantàt :
allentat su ciuliru
e ascurtàt...
ascurtàt...