GOSOS DE N.S.SU REMEDIU
(Concorso a prenio "CITTA' DI OZIERI")

Istella de s'Aurora
Perfetta lughe serena
Salvade a totus de pena
De su Remediu Signora.

De sa Terra sos mortales
Ca non naschen in puresa
Disian s'alta difesa
De donos celestiales
Chi de penas infernales
Los salvet in dogni istante;
Bois chi sezis costante
Cunfortande sos afflittos,
Dades a sos poberittos
Appozu firnu a dognora.
Salvade ecc.

In sa ostra santa vida
No hazis negadu azudu
Né a surdu, né a mudu,
Né a sa zente famida;
De sos ogos sa ferida
Hazis a zurpos sanadu;
Hazis semper preigadu
A ladros e assassinos
Chi lassen trîstos caminos
Bessendinde binchidora.
Salvade ecc.

Bois bene a connoschenzia
De sos males de su mundu
Chi cun fervore profundu
Dispensades assistenzia
A sos ch'invocan clemenzia
Pro cummittidos errores;
Chi privades de dolores
Totus sos isfortunados,
De tantos nalassortados
Sezis sa consoladora.
Salvade ecc.

Perpetua fiamma divina
Funtana de caridade,
S'umana comunidade
Preservade de ruina;
Faghide chi sa meschina
Undada de ateisnu
Sublimada cun cinismu
Siat istruncada in nettu;
Chi s'hapat firmu rispettu
A sa Fide protettora.
Salvade ecc.

Santulussurgiu 31 Adosto 1956
Bachisio Asili