Contos de foghi le e de computer

«Mare biaittu sutta s'iscalinada
'e oro chi su Sole falat isplendente
radiosu triunfante indifferente
a sas Undas de sa temporada

tucchende a sa jaga 'e amatista
de sas Roccas ardentes incantadas.
Su Lentolu 'e Nue est accudidu

biancu doradu rosadu lughente
e isettat lebiu su comandu 'e su 'Entu
de imboligare su padronu potente
in s'iscuru 'e sa notte ch'est benzende.
Sa Ribattida lenta in s'oru 'e mare
toccat
resonat
minutos contende
de s'intrighinu gloriosu solenne
de su Re Imperadore d'Oriente
chi est intrende in su Rennu d'Otzidente

lettu mannu bene assaccarradu

in ue drommit chietu
fizzu 'e mama!
Su portale 'e fogu sun abberzende!
Sos Montes tott'ingiru che nuraghes
sun armaritzos rujos minettosos
e defenden sa lacana balentes
dae sos Diaulos de s'abissu malaittu
chi hot s'aidu affacca a s'essida 'e ponente.
E sas Janas ermosas...».

De giaja cara sos contos a sero!...
Semper rammento
antziana
no... antiga...
ma... guasi 'ennidu so a s'edade sua!...

Una contanscia hoe narrer cherìa;
imbetze unu piaghere m'han pedidu:
setzidu ainnanti a su foghile nou

chi giamamus computer puru in sardu

in internet ammustro a netta mia
de ses annos lompidos gianteris
sa paristoria
in figuras truncadas
e colores falsos indruvigados

de s'atzudu astronauta giapponesu
chi perdidu s'est in sa galassia aliena...

A manna
netta mia
hat a 'mmentare a mie o a su computer?