Araxis de passioni

Araxis de passioni
de totu dì paradas
cun dilicadesas
e complizis miradas
furtivas
a trivas donadas

eus respirau
imprassaus.

Araxis de passioni
alidaus cun suspirus

donadas intr' 'e labius
e strintas

basidus scambiaus
cun ardori
alluppaus
intr' 'e lamentus diciosus
pispisaus
in pampas de soli
s'ant pesau
a is circhiolas de is saboris
prus gustosus de sa vida.

Araxis de passioni
suladas
in d-unu avolotu mudu e giojosu

ant traspassau
dogna pimpirina 'e carri
cun strioris de gosu
regalendunosì
is biadesas estremadas
de is arcus
prus artus de s'universu.

Araxis de amori
a rendiri grazias
po su donu arriccìu
e pustis
assèliu e reposu

in s'abetu schissiosu
de s'attoppu sighìu.