Premio OzieriPremio Ozieri di Letteratura Sarda 

Nelzan chi so unu poeta 'e s'orija
de su coro in peruna manera
chi no s'idet, in su versu, Sardigna.

 

Ma ponzo a bolare su Mundu
cun alas de limba 'e mill'annos
no colòviu undighisillabu
no làgrimas de farmacia
no puddedras pastores e montes
in sa mèria de unu sole chi ùsciat
s'irvigu
o in s'umbra de luna ch'iscolzat.

 

In su senadu 'e su cantu
mi sento
mucconosu de atzas primidias
e timo
sas romadias 'e su versu a s'indonu.
Intrinadore
ello, intrinadore
ca intro in s'àidu 'e su sonu
bell' intramiche a paràulas
In su meuddu 'e su sensu
mi ch'intro
che-i su sole pius bellu 'e su sero
in boza 'e tramudare in avréschida.

 

E no canto ne gherra tzivile
ne trummentu de s'ìsula sarda
ne assuconu in s'oru 'e su mare
ne peleas battagliende s'istranzu:
est solu infiammascione-pregunta
sa chi a nùmene li ponzo sard-ite(?).
S'òmine de ogni die
ogni die est òmine.

 

Custa est paraula-parole
chi gallizat
in verba e words
su machine chi no est maladia
rascinare in undas de sensu.
S'intrinada de su sole dannarzu
cando pàsidu e betzu
est ladinu
e m'offerit vocales
consonantes bundantes
no presumidu, pius maccu
mi faghet
su sole de sa limba mia.

 

Cristiano Becciu (Ozieri)
1° premio 2006
(Sezione poesia inedita sarda «Antonio Sanna»)

Torna all'inizio del contenuto