E tando nara
pruite mi chimento sos tzelembros:
mannales addesco
in picas de conca
ca tue
chessa murichessa
lozu lizu
in s' iscia lanza
de sa die.
E tando fala
trainu muizosu de s'isetu:
espeterranza duda
in sa luzana 'e su coro
e tue
mariposa tilipirche
ua lua
in s'iscia lanza
de sa die.
Fémina
sonu trazadore
ca ses nébida,
bolu traitore
ca ses déchida
e sémida
inue rujant
sentidos e carres.
Sèmene trèmene
cando sa 'oghe tua
puzonat suzonat
sos sonnios.
Cristiano Becciu(Ozieri)
2° premio 2004
(Sezione poesia inedita sarda «Antonio Sanna»)