Bòrulos de tempus
Ma si basterat una poesia
Pro arrundar’e lughes su sentidu,
Ch'esserat issa jogulu che nidu,
Ch'abbòniet su ris'a sa trascia…
Chi ti carignet in sa tiridia
Chi sighit de sa manu su caminu,
In sa carosa chirca de su sinu,
Su cantaru de vida, eterna via.
E a bias sos ojos mios
a chircare los torrant
cuddos bisos
de cumbèssias chena làcanas,
intre undas de mare
intre baddes de assèliu…
cando su coro si m’annuzat
in un’inghìriu de dansas,
de pees chi bòrtulant
renas infustas de làgrimas
e sàmbene,
dansas de bentos murros suladas
ch’ant boddidu su gosu
de francas isfidiadas…
E intesu l’azis
unu bòrulu e anzoneddu…
chena istrachesa,
mutende sa mama de sa paghe?…
cun passitos dìligos
in unu cuinzolu de tempus
mi lu gàrrigo …
si de custu isciareu de dies
ch’intritzant males e poderiu
non mi sero…
unu bòrulu de anzoneddu
dia chèrrere apasigare…
Proenda de beranos
e tianu de sentidu
at a èssere s’istima…
In una cumbessia chena làcanas
una foza de frore
su fumu murru
de s’aera est trunchende…
E intesu l’azis
unu bòrulu de anzoneddu...
chi sa mama non lassat
de s’ispera…
Bi dia esser bon'a l'imprentare?
Titolo |
Bòrulos de tempus |
Sezione | Poesia Sarda Inedita |
Autore | Rachel Falchi |
Nome | |
Anno | 2022 |
Argomento | |
Descrizione | |
Lingua | |
Editore | Premio Ozieri |
Contributore | ATHENA SRL |
Tipo | |
Formato | |
Fonte | Premio Ozieri |
Relazione | Concorso Premio Ozieri 2022 |
Copertura | Logudoro, Sardegna Italia |
Diritti | Comune Ozieri, Premio Ozieri |
Analisi del Testo |