Sizz'anda trimurendi in bagantiu
l'ora di foggu pisurendi fenu
chi li massai dall'occi aggrucciupiddi
boggani in pala cun caddosi diddi
candu lu cori tentu dall'arenu
brusgia di seddi pa lu longu isthiu.
Abà lu triggu s'ammuntona in oru
e ruddurendi luzi pa l'agliora
candu Maria cun Rosa è a mani in chintu,
e lu biaittu chi lu zelu ha tintu
immobi un cantu naddu tutt'a un'ora
d'ommini, femmini e pizzinni in coru.
È cantu chi si bogga da una pena,
l'avvisu d'una pazi suipiradda
sott'a l'ipperu d'eba o di muddina;
nisciunu intendi dolu pa l'ischina
so già sanaddi e pronti a la baddadda:
un riu di pazi chi poni in piena.
È festha, è l'ora di pisà lu baddu,
la pippa di lu canu ha la fumadda
e v'è d'ammentu chi l'inverru è mosthu;
e da luntanu cu lu corru tosthu
puru lu boi in doppia ruzziggadda
agguant'in gruppa l'ugni di lu jaddu;

è pazi chi si feima i la campagna,
sott'a la grunda biddisò nobari
boggani un cantu tecci già di triggu
e la radizi di lu crabbufiggu
è piena di fuimmigguri a firari
e v'è la baja chi fra poggu s'agna.
Soru lu riu figlioru di siccagna
v'ha l'eba d'una lagrima, biaittu
già no s'accostha pa gudì la festha;
è feimu, muddu, cu la bocca abestha
cumenti sia dumaddu da lu rittu
e vagliu di liccori abà si lagna.
E drommi, è muddu, e drommi più dugn'annu.
V'hani più eba in fronti li massai
ch'hani missaddu triggu ch'è luzendi.
Eddu è drummiddu, l'asthri so baddendi
miraguraddi più di cantu mai
da lu trabagliu fattu chena ingannu.
Abà cu lu sumbreri posthu in manu
puru i lu baddu l'aggiu irrinucciaddi,
l'aggiu musthraddu li muntoni fatti
tutti di triggu e già sopra ali ratti
chena infundilli, quasi tutti inchiaddi,
beddi puppioni da saimenti sani.
E allora gloria e pazi a la natura
ch'ha tuttu in manu di Nosthru Signori,
gloria a ca suda, gloria a li massai:
e si i la tanca no vi piobi mai
bastha un cutteggiu sanu di sudori
pa rinnoballa candu veni ischura.