A Manlio Brigaglia

Culpa no decu dà a la giuria ,
chi poca folza mi sent'in paltenza,
e un verdettu fora di cuscienzia
eu pal primu lu criticaria;
lu giustu è chi lu premiu si dia
a lu ch'é meddu cun giusta sintenzia.
Però si mi ni spetta, ammentatinni
chi midaddi no voddu a mandamminni.

Mandami meddu, si t'è cunsintitu,
una piccinna bedda d'Ozieri
No ti sarà lu compitu liceri,
chi in programma no è inseritu,
ma chissu è lu me premiu graditu,
l'unica cosa c'aggiu in disideri;
e si pal casu pussibili t'è,
la ch'è più bedda lassala pal me.

Ozieri m'è caru e sempri in menti
l'aggiu sculpitu e tantu l'aggiu in cori.
So li femini beddi che fiori,
chi più li miri e più so attraenti,
so che li rosi di beddi culori,
tutti li luci pura risplendenti.
M'ani datu l 'incantu e tilla giuru
c'una o milla gadagnu o milla furu.


Altu premiu mi chi non n'aspettu,
cilca pal tantu di di trattammi bè.
Mi no si anziana come me,
palchi saria di fammi un dispettu.
Sidd ' è anziana tenila pal tè,
tanto si tu la mandi no l'accettu.
A me mi mandi una bedda steddona,
simpatich'e ben fatta di passona.

E dilli a la giuria di scusà
siddu mi socu mali cumpultatu:
si socu in Ozieri innammuratu,
di piddassilla rascioni no v'ha.
In Saldigna, lu sa ca c'è istatu,
chi piccinni scadenti no ci n'ha,
chi li femini saldi in generali
so simpatichi e beddi tutt'uguali.

Fideli L'Olcu


A un direttore di giornali

Siddu voi arrià in poltu sanu,
tu chi polti la balca, statt'acoltu,
no se mancu staccatu da lu poltu
ch'in cuntrastu mi parini li enti.
A la guida toia intelligenti,
a la bravura di li marinai,
affidat'è la balca casu mai
si mustressi lu mari minacciosu.
Cantu più t'è lu mari insidiosu
alta dei tinè la to bandera,
a affruntanni di dugna manera
si tu voi lu scopu raggiungni.
Pa pudè di li frutti riguddi
prima bisogna c'aggi siminatu,
ohi nudda enj senz'esse sudatu
massim'a noi chi semu in Gaddura.
Da la bravura di lu capitanu
dipendi l'arrià:la balca in poltu
ma si voi arrià in poltu sanu,
tu chi polti la balca statt'accoltu.

Fideli L 'Olcu


Un invitu

Pal cunniscì li Saldi, o furisteri,
la meddu cosa è chi vengh'in Gaddura,
vidè cu l'occhi toi è ministeri
com'è l'indoli nostra pal natura.


Vintu lu sensu c'hai di paura
torraristi tra noi vulinteri;
no t'escludu chi torri addirittura
in mezu anoi pal piddà mudderi.

Mancu di chissu saristi dolenti,
c'a spusassi in Saldigna si gadagna;
ch'è la salda modesta e viltuosa.

Si tu veni in Gaddura teni a menti,
si pal casu no l'hai la cumpagna,
ci dummandi una salda par'isposa.

Fideli L"Olcu