Ite paret, s’illughinat d’isperas
uv'est custa figura istilitzada
ardimentosa e lughida s’ojada
chi ispritzat orgogliu e fieresa
bafos lisciados chin delicadesa
manizos bonos e bonas maneras
sa sarda limba tenet in fermentu
pro esprimer afetu e sentimentu
 
carchi virtude chin carchi difetu
mischiat in sa matessi pantomina
ca non bi naschit rosa senz’ispina
de su sardu mantenet s’aghentinu
puru s’istat lontanu pro destinu
ammitit puru chi no est perfetu
in sa cultura sarda at unu impignu
e faeddat cunforme a su designu
 
non zedet si in mente at un’idea
no s'arrendet si cheret una cosa
ca in coro si la rendet pretziosa
bastat chi lu ripaghet chin onore
non l’interessan fatica e sudore
mancu s’istat pro annos a pelea
si sonniat fiorinde cudd’ispiga
ue dogni manu s’atringhet amiga
 
non lesinat azudos e cussizos
como chi s’avicinat sa vetzesa
moderande sa tassa e i sa mesa
s’imbetzat virtuosu e elegante
in limba sarda giogat a s’istante
cumbinande moinas e abizos
ca brullat chin nepodes e livrìa
a tocos de proverbios e poesia
 
sa limba sarda nat est visìone
raighina santa de patria nadìa
declamat libertade e autonomia
in s’istoria balente che l’imprea
in lumene de Lussu e d’Arborea
pro fagher sa Sardigna nazione
gai suspirat, rientran a dimora
sos fiores chi sun bolados fora