Chi non siat verdaderu
si ti mancan sos fiores
chi a meles dan sabores
che rues in disisperu.

Est su tempus in turmentu
e ti nd’est dende sas proas
cun caluras e pioas,
tue òmine, s’as assentu,
istare deves attentu
c’appensadu t’ido abberu,
como leas cunsideru
chi sa natura at importu
ca già nde l’as fattu tortu
chi non siat verdaderu!

Po nudda ses innotzente
si cras viven fizos tuos
in mesu a crastos e ruos
chentza mancu unu padente,
non sias indifferente
ca si sensan sos umores
de abbas e de lentores
chi sa vida an favoridu
das adiu a custu nidu
si ti mancan sos fiores.

Su ch’as est de pretziare,
unu mundu goi accisu
cun su sole in cara a risu,
una luna po bisare
ue mai l’as agatare?
Galu grinas cun lugores,
su mare ’e bios colores,
in s’aera mariposas,
abes e nuscos de rosas
chi a meles dan sabores.

E s’ispantu ’e caros ranos
chi sustentu t’ana dadu
finas cussos as luadu
ca sos fruttos fittianos
chi regoglies cun sas manos
pius no an gustu meru,
e si bi pensas cun seru
a s’ambiente e a usu
chi nd’as fattu cun abusu
che rues in disisperu.