Cantoris de Biddanoa
de Santu Cristu
e de Santu Anni
estremaus e dignus
cantoris de Cida Santa
a campanas ammutaras
bistius de penitenzia
e gutturus inchietus
apparaus e obertus
arrubius de izzerrius
contra a is traitoris
cantoris de pena e de doloris
avattu a su Crucifissu
po is antigas arrugas
de Biddanoa
in mesu a su bonu
antigu populu de Biddanoa
a fentanas
de cinixalis mantas amuradas
e nenniri in is antigas domus
de Biddanoa
nenniri de scuriu marriu
nenniri de affinu
po is antigas cresias
de is cantoris
maistus ferreris e fusteri de primori

maistus cantoris de is Misteris
e de Resurrezioni
candu a s'Incontru
in totunu a su noeddu arrepiccu de is campanas
de arrepenti nd'arziada a celu
sa grandu boxi insoru
e de asulu incrispiat
cun s'allutu ischiliu de is varzias in rodia: Gloria!
Gloria! Gloria currit po s'antiga Biddanoa!
È Gloria: in Biddanoa de Casteddu.