Fruliade sas falches, fruliade,
manigadores de pane e chibudda.
Como su 'e messare hazis messadu,
in custa terra morta ... Terra morta!
Fruliade sas falches, e in sas carres
bestide, torra, sa ruza camija
chi cuet sas inghettas de su sole,
su mossu de su sede in sas pettorras.
Sezis messende sonnos austidos,
a sas caldanas de soles d'Austu,
s'anima fruliende in sos restujos.
Cantones senza briu sun sas bramas
chi arrughidas bos morin in buia
e d'est fritta sa falche
e frittu est su suore
chi si che surzit custa terra morta!
Sezis messende mattulos de pena
e los sezis lighende cun s'ispera,
pro fagher un'arzola de piantu,
'ue su ranu già fattu zenina,
misciu a sa paza che sulat su 'entu
in custa terra morta. Si che sun andados
tottu, e che sun addae. Bois solu
sezis in cue, a messare chimeras.
Sezis in cue a regoglier su nudda,
su nudda de sa terra abbandonada
chi si sentit traita, e chi isettat
sa festa 'e sa torrada,
sa festa antiga 'e sas arzolas mannas!
In su trighinzu de giannas serradas,
sas coberturas 'nde sunu ruende.
Una 'ezza, incrispida, isdentigada,
che-i sa morte est restada a sa sola
in su giannile, e isettat e narat:
«Fruliade sas falches, fruliade,
manigadores de pane e chibudda ...
Como su 'e messare hazis messadu,
in custa terra morta, terra morta!».