Sa luna fi' gioghende
a notte manna
cun sas chimas brujadas de sos chercos;
che uppa malaitta,
mazzone bardaneri
ojos de lampu,
a un'arvèghe rutta
meliende
fi' suzzende sas venas,
sutta su chelu craru
a notte manna;
l'han bidu sos ozastros,
elighes e almutos,
sos crastos benosos de su sartu,
su lentore 'e sa tanca;
e bidu l'hat sa luna,
fittiana 'e sa notte,
su bardaneri,
ma ... issa fi' gioghende
cun sas chimas brujadas de sos chercos,
sutta su chelu craru a notte manna!