Sun sas ses de manzanu,
e-i sa costa non s'idet ancora.
In chelu s'aurora,
muda muda nd'istudat sas istellas.
Isto che sentinella,
totta sa notte ficchid'in sa prua.
Sa nave hat paga fua,
no est che dea a palpitos de coro.
Millos sos montes de su Logudgro
de sa Sardigna mia beneitta!!
Beneittu su mare
chi ti abbrazzat in tundu,
e non s'istraccat mai 'e ti 'asare;
beneittu su sole,
chi 'essit a t'iscaldire d'anzi die;
beneittos sos rios,
chi sun sas benas de su coro tau;
beneitta sa zente,
chi 'enit abbramida 'e cosas tuas;
beneittas sas uas,
chi dana binos bonos e frizzantes;
beneittos pastores e bratzantes
chi lottana pro ti ogare a lughe.
E beneittas sas rughes,
de chie est mortu pro ti aer amadu;
beneittu s'aradu,
chi t'inserrat in sinu trigu e fae;
beneittas sas naes,
chi dan fruttu in istiu e in beranu;
beneittu su ranu,
chi creschet a pastura 'e sos masones;
beneittos sos puzones,
chi torran a nidàre dai nou;
beneittu su populu tou,
ch'ischit suffrire chena unu lamentu;
beneittu su 'entu,
chi ti carignat a sera e manzanu;
beneittu su Deus Soberanu,
chi t'hat criat' in su coro 'e su mundu
pro ti tenner de oju fitianu.