Candu hat a bennere su sero meu
e m'has a narrere:
Passamus a s'atter'ala
porrimi a su mancu sa manu
e faghe chi cussu passare
non siat longu
e chi non siat attesu
s'atter'ala.
Passamus a s'atter'ala
e hapo a intende dolore
pro tottu cussu
c'hapo a lassare inoghe
e m'hapo a girare a issegus
a torrare a abbaidare
forsis pro una 'olta
solamente
su c'hapo amadu e godidu.
Passamus a s'atter'ala
e hapo a tenner timore
meda timore
si hap'a lassare
chenza pagare
calchi depidu
a sos frades mios,
hapo a timere si Tue
su pane de ogni die
non m'has negadu
e deo sos depidos mios
non hapo a haer pagadu.

Candu hat a bennere su sero meu
e m'has a narrere:
Passamus a s'atter'ala
porrimi a su mancu sa manu
ed in sos ojos tuos
faghemi leggere su perdonu!