Siccas sun sas funtanas
disertas sas alzolas
brujados, sos ozastros
ruttos, iscovecados sos cubones,
boidos abbandonados sos cuiles .. .
Dae antigos campaniles
sonan campanas tristas ...
Pesat su entu litanias de interru
lùttian sos chelos toccos de agonia:
su toccu a sa Sardigna sun tocchende,
sende ia sepultada.
Miradelos sos mortores,
sos chi la sun carralzende,
chi che l'interrana 'ia.
'la che la sun interrende
de cadenas barriada.
In pinn'a sa Iosa abelta
bi movet una faletta:
sa 'e sos battor moros.
Sas cabessas de sos moros
a bistrale muzzurradas
bolan che aes malas
sas chi in die 'e temporada
fuen sighende su entu ...
Oh moros zegos!
Oh sardos zegos zegos inzegados!
crèstianos umiliados
de somas opprimidos

de meguentes trattados
"mal unidos y locos", olvidados,
de penas consumidos e de ingannos ...
Antigas disamistades sas venas bos han luadu
e mere e capitalistas sos chi b'han profetadu,
presos bos han a sa mola, bos han giuntos a s'aradu.

Teraccos male pagados
mudos surdos e cagliados,
imbastados e imbrigliados
truvados che ama furada
bèndidos a petta baratta,
allogados che bestiolos
che belveghes imbrancados
in log'anzenu imbroccados
de una maner'indigna:
Poete de Sardigna,
si mentovas emigrados
giuilannos bandidos,
chena culpa confinados!