Chie nd'ischit si torro
da' nou a t'abbrazzare
terra mia?
Ma chin sa fantasia,
tottu s'affettu meu
ti c'apporro.
In custa inospitale
terra ingrata,
sos fizzos tuos
male cumpensados
sunu, e a mala pena
supportados,
a furia de mattana
e de cumbatta.
Unu campu minadu,
pare pro sos istranzos
custu logu,
prontu a leare fogu
appena faghes
unu passu isbagliadu.
Che for'essidu
in custa terra istranza,
mi punghene che ispinas,
sos ammentos.
Però, custos lamentos,
no intendet nessunu.

Ma anzis, sos che sunu
in altu,
paret de ch'esser fora
sun cuntentos .
Si torro!. ..
Ma chie nd'ischit si torro?