... E che a tando istanotte
in su chelu hapo una tanca
e che a tando mi 'iso e conto
chentu isteddos, chentu arveghes,
tottu de lana bianca,
pasculende isparminadas.
Già sun issas. Sun torradas
tott'in d'una e a una a una
mi las miro. Ah! Sun torradas
sas amigas de una 'ia!
Poi de colpu m'arreo
non sun issas no, so deo
ch'istanotte so torradu
che a tando in pizzinnia.
So un'atteru, imbezzadu
corno, istraccu 'e tribulias,
cun su pesu subra palas
de caldanas e traschias
e pro cussu a carre a terra
che a tando mi so lampadu
e che tando, istanotte,
in su chelu hapo una tanca
chi haia ismentigadu.
Ma proite, ma proite,
lughidu chelu 'e istiu
e de giannarzu isteddadu,
proite a t'haer lassadu
cando in te pasculaia,
liberu cun s'ama mia,
senz'imbojos de crisuras,
in istesas pianuras
senza fine e ne cuntrastos?
.. . Proite?
Troppu a tardiu
t'hapo de nou incontradu
lughidu chelu 'e istiu
e de giannarzu isteddadu!