Miracle, monzigheddas de s'aera,
chi bos pasades in su filuferru
de domo mia, lughidu che prata:
cant'est boida e trista sa garrera!
Paret su camineddu
de unu mundu moltu
solu dae sas rundinas amadu.
Sos ch'inoghe minores han giogadu
sun in terras lontanas,
che frommigias in tana
ilboidende sos montes anzenos,
chin sos ogios fiores de tristura.
Bidide, monzigheddas de s'aera,
sos caros montes mios:
zigantes tottu a nou tramudados,
mudos, imbranconados,
mirende chin dolore
su sole 'e su 'eranu
chi lughe faghet a unu deseltu.
Nademi, monzigheddas de s'aera,
cando a custa garrera
cuntentos han a riere
sos caros amigheddos de una ia?
Cando in sos montes mios
ten zoccare sas minas
che nughes a s'aera in di' 'e festa?
Ah, si custu idia!...
Cantande allegramente, naraia,
fina in sa domo ezza
c'hat guasi sas teulas pendende,
inue un «omineddu» aispettende
una marna hat piantu;
ca penso: fina issa, forsi, siat
cuntenta in campusantu ...
Ma cando, sorrigheddas de s'aera?