Ses Otieri terra tantu digna
chi pro sorte s'antigu collocadu
t'hat in coro 'e sa nobile Sardigna.
Sas Musas t'han sos fizos allattadu,
dendelis, cun sa 'oghe armoniosa,
unu dulche limbazzu, delicadu.
Tempera forte, de zente operosa,
chi tenes bantu d'esser nominada:
«Zittadina 'e progressu, industriosa».
Tenes costante, in coro inserrada,
sa fid'antiga de sos babbos mannos,
ch'iras e bentos no han intaccada.
E pro custa, devota, in riccos pannos,
solennizzas sa Marna Protettora
rimediu seguru 'e sos affannos.
S'Immaculada, Virgine Signora,
ti ricumpensat gai, a larga manu,
in totu sos momentos, a dogn'ora.
E beneighet su trabagl'umanu,
su populu, sa terra, sos masones,
cun grascias e favores fittianu.
E ti dàt su sustentu a sas persones,
sa paghe, sos cunfortos de su coro,
cantu bramas, disizas e propones.
Canta Otieri! Canta versos d'oro,
cun sentimentu sardu e melodia
in s'antigu limbazzu 'e Logudoro.
Fagh'intender sa santa «Ave Maria».