LU SPÌRIDDU DI LU TEMPU

Fala lèbia che sònniu di piccinna
la sera innantu a lu mari, allisgià
pari la pagi dassadda da l'ùltima
ansciosa brusta d'istiu.
S'avvìsani ghjà i’ l’ària di l'attugnu
chjarori, e tèbii ancora li rurrù
chi s’àlzani da mari
in un riu odorosu d’erbi e sali.
Bogi, chjàcculi, suspiri furaddi
a li silenzi tòrrani
firiddi a la mimoria, sguttigghjègghjani
ammenti, scièddani azzuddi nostalgii
no solu pà lu tempu
ch'è passadu cumenti
un ventu attruppugliaddu. No, sarìstia
fàcili sbrugliassilla
cussì, assulvèndigi noi matessi
d’essè ruscighinaddi
innantu a chista terra chena avè fattu
abbastanza a migliuralla, o pègghju
senza dassà un'imprenta
evidenti di lu nostru passàgghju.
Da l’altura di chista sera cana
muddu figghjulu la dì
chi s’alluntana, tèttaru ispiriddu
a vìgghjà che li scogli in ghjru in ghjru
a la mè rocca. D’intindì mi pari
mùsichi e soni iscinni da l’intragna
più cuadda, lu cori zocca, s’ùmmula,
si sfagi, altru no semmu
che lu passaddu chi drentu ci istragna.