...e rujo su caminu 'e si'intrìnghinu

.... e rujo
su caminu ‘e s’intrìghinu
cun sa bertula a coddu
‘e sos anneos,
tra ruos e mujos
chi raffian s’anima.
Ogni frina mi ferit
e bentulo che giuncu!
Cucuzadu ‘e nie
s’est su monte ‘e sa vida,
chei sos annos
chi mi sun incanende.
Mutza como apo ogni ala,
andan lentos sos passos
e sos pessos
si faghen apporados.
In s’apposentu mudu,
alas de bentos trobojados
muen airados
in sas ventanas…
che pedras de frunda!
Buttios de solidade
si perden
in su mare mannu ‘e sa mudesa,
mudesa ‘e neula
ch’iscorriat sos muros,
chei s’iscurigore
sutta sas pijas de s’anima.
E tando, die pro die
graminende sas oras,
a boghe lena
m’incumando a Deus,
cun sas pregadorias,
O m’abbratzo
a s’alleriu ‘e sos ammentos,
mazines e ameddos istimados,
chi torran a brotare che cantaros
a mi catzare su sidis...
e in s’anima
una paghe noa,
che làmmia ‘e lughe...
s’imberghet, sulena.