SELLENZIU

Fiat lòmpi'a bidda mia
no si scit di aundi.
Artu, robust'e biundu,
ogus color'e celu,
conc'a sa "nazarena".
Hiat agatàu stampu
po biv'e po dormiri,
ma no teniat lettu,
né cadira po sezzi,
né pingiada, né prattu.
In mes'e s'aposentu
hiat scavàu fossa
de sa mesura sua,
dda sterriat de zàppulus
inguni si corcàda.
Si presentad'a is domus,
ma no tendiat sa manu,
né spiccigat fueddu.
Bellu e imponenti,
poniat in totus géna
e nemus ddi negàda
unu pani calénti,
o casu o sartizzu.
Cun sa bértul'a coddu
che 'nu para circànti,
pigàd'e s'indadàda.
Is pantalonis bonus
chi ddi benìant offertus,
ddus appoddat de zàppulus.
Ddu zérriant "Sellénziu"
cà mai hiat chistionàu.
Dd'hant agatàu dormiu
cun is manus in gruxi
in cuss'urtimu sonnu,
aintru de sa fossa
chi si fiat iscavau.